१० फागुन,
बाँके। आसन्न प्रतिनिधिसभा सदस्य निर्वाचनलाई लक्षित गर्दै नागरिक उन्मुक्ति पार्टी (नाउपा) नेपाल र प्रगतिशील लोकतान्त्रिक पार्टी(प्रलोपा)बीच बर्दिया र बाँकेमा चुनावी तालमेल भएको छ।
दुई पार्टीबीच बर्दियाका दुवै निर्वाचन क्षेत्र तथा बाँके निर्वाचन क्षेत्र नम्बर १ मा एकअर्कालाई सघाउने सहमति भएको हो। सहमतिअनुसार बर्दियामा प्रलोपाले नाउपा नेपालका उम्मेदवारलाई समर्थन गर्नेछ भने बाँके–१ मा नाउपा नेपालले प्रलोपालाई साथ दिनेछ।
बाँके–१ मा प्रलोपा तर्फकी प्रत्यक्ष उम्मेदवार कृष्ण केसीलाई नाउपा नेपालले समर्थन गर्ने नाउपाका संरक्षक रेशमकुमार चौधरी ले जानकारी दिए। उनका अनुसार उक्त सहमतिअनुसार प्रलोपाले नाउपा नेपालको समानुपातिक उम्मेदवारलाई पनि सघाउनेछ।
नाउपा नेपालबाट बर्दिया–१ मा पूर्वमन्त्री अब्दुल खान र बर्दिया–२ मा खुसीराम थारु उम्मेदवार रहेका छन्। ती दुवै उम्मेदवारलाई प्रलोपाले समर्थन गर्ने सहमति भएको बताइएको छ।
प्रलोपा बर्दियाका प्रमुख गेहेन्द्र प्रसाद ढकालका अनुसार बर्दियाको दुवै निर्वाचन क्षेत्रमा नाउपा नेपाललाई सघाउने समझदारी बनेको हो। यसअघि प्रलोपाबाट बर्दिया–१ मा राजु रानाभाट र बर्दिया–२ मा नेत्रराज आचार्यले उम्मेदवारी दर्ता गराए पनि पछि फिर्ता लिएका थिए।
दुई दलबीचको यो तालमेलले बर्दिया र बाँकेका निर्वाचन क्षेत्रमा चुनावी प्रतिस्पर्धालाई थप रोचक बनाउने अपेक्षा गरिएको छ।
